Yanmağa iver cânum pervâne miyem bilmem
Zencîre düşer gönlüm dîvâne miyem bilmem
Esrâr-ı gam-ı aşkun sînemde nihân oldu
Kalbümde hüznüm vardur vîrâne miyem bilmem
Humhâne-i vahdetde içdüm yine peymâne
Yâ hû diyüben döndüm mestâne miyem bilmem
Hep yansun içün taşum aksun sel olup yaşum
Meydâna kodum başum merdâne miyem bilmem
Kapunda Yûnus gibi var nice bin hizmetkâr
Görmedi gözüm dîdâr bîgâne miyem bilmem
Nişânı vardur sözinde
Allah ile olanlarun
Hak nûrı vardur yüzinde
Allah ile olanlarun
Vardur bir gizli sırları
Tâ arşa çıkar elleri
Halkdan gizlidür yerleri
Allah ile olanlarun
Be hey âşıklar sâdıklar
Hak dîdârına lâyıklar
Ne bilsün hâlin ayıklar
Allah ile olanlarun
Bize ta'n iden münkirler
İder mi ma'nâ fikirler
Ne bilsün hâlini körler
Allah ile olanlarun
Yûnus Emre'm kılur zârı
Hak nazarıdur nazarı
Hak ile olur bâzarı
Allah ile olanlarun